معاشرے کے تمام طبقات کو قومی دھارے میں شامل کیے بغیر ترقی ممکن نہیں، نئی نسل کارخیر کے کاموں میں بڑھ چڑھ کر حصہ لے، ایمان، اتحاد اور تنظیم کے اصول ہمارے لیے مشعل راہ ہیں، اس مقصد کیلئے اسکاؤٹنگ ایک بہترین پلیٹ فارم ثابت ہوسکتا ہے ۔میرے نزدیک اسکاؤٹس ایک تربیتی تحریک ہے جو تنظیم، نظم و نسق اور خدمت کی تربیت فراہم کرتی ہے۔ جس کے ذریعے بچوں کو صفائی ستھرائی اور صحت افزاء ماحول کی اہمیت سے آگاہ کیا جاتا ہے۔ اسکاؤٹس کو چاہئے کہ عالمی سوچ کے تحت مقامی سطح پر بہتر دنیا کی تشکیل کیلئے تمام افراد کو منفی حدود قیود سے بالا تر ہو کر اجتماعی طو رپر معاشرے کی تعمیر کا فریضہ انجام دینا چاہئے کیونکہ اجتماعیت ہی وہ قوت ہے جو ریت کے حقیر ذروّں کو متحد کرکے ناقابل تسخیر چٹان بنا دیتی ہے ۔ ضرورت اس بات کی ہے کہ رنگ و نسل ، علاقایت اور طبقاتی بندیشوں میں بٹی ہوئی لاکھوں اکائیوں کو یکجا کرکے ایک ایسی و حدت میں سمو دیا جائے جس سے اس مقصدکی تکمیل کے مراحل آسان ہوں ۔ اللہ تعالی آپ کو کامیابی عطا فرمائے ۔

مجھے خوشی ہے کہ سندھ بوائے اسکائوٹس ایسوسی ایشن نے پاکستان میں اسکاؤٹ تحریک کے فروغ اور اسکاؤٹنگ کے اعلی مقاصد کے حصول کی سمت میں ہمیشہ اہم پیش رفت کی ہے گلستا ن اسکاؤٹس ٹریننگ سینٹر سے میرے ماضی کی یادیں وابستہ ہیں کیونکہ میں بھی اپنے زمانہ طالب علمی میں اسکاؤٹ تھا اور اپنے ہاتھوں سے ٹینٹ پیچنگ کیا کرتا تھا دوران اسکاؤٹنگ جو کچھ سیکھا وہ میری عملی زندگی میں بڑا کام آیا ۔اسکاؤٹنگ کی تربیت کےدوران یہ سکھایا جا تا ہے کہ وہ کسی طرح دوسروں کی مدد کرسکتا ہے یا ان کے کام آسکتا ہے ۔اس کے علاوہ عالمی وبا کورونا اور سیلاب کے دوران سندھ کے اسکاؤٹس نے اپنی جانوں کی پرواہ نہ کرتے ہوئے دوسروں کی زندگیوں کو محفوظ بنانے کیلئے گراں قدر خدمات انجام دی ہیں ۔اس کے علاوہ کراچی اور دیگر شہروں میں ہونے والے حادثات کے دوران ہمارے اسکاؤٹس امدادی کاموں میں پیش پیش رہتے ہیں جبکہ دیکھا یہ بھی گیا ہے کہ جب بھی ملک و قوم کسی بھی ناگہانی صورتحال سے دوچار ہوا ہے تو اسکاؤٹس نے ہر اول دستے کا کردار ادا کیاہے ۔ میں سندھ بوائے اسکاؤٹس ایسوسی ایشن کو مبارکباد دیتا ہوں کہ وہ ایک بامقصد اور معیاری سفر پر گامزن ہیں۔ دنیا میں وہ ممالک آج ترقی کی منازل طے کرتے نظر آتے ہیں جو اپنے نوجوانوں کی صلاحیتوں کو اُجاگر کرنے کیلئے صحت مندانہ سرگرمیوں کی پذیرائی کرتے ہیں ۔ پاکستان میں یہ فریضہ بوائے اسکائوٹس تحریک سے وابستہ لوگ با طریقِ احسن انجام دے رہے ہیں جو کہ قابل تعریف ہیں ۔

بحیثیت چیف اسکاؤٹ سندھ مجھے فخر ہے کہ سندھ میں اسکاؤٹس کی سرگرمیاں دیگر صوبوں سے زیادہ ہیں اور سندھ کے اسکاؤٹس ہر میدان میں دوسروں پر سبقت رکھتے ہیں ۔اسکاؤٹنگ ایک عالمگیر تحریک ہے اور اس تحریک سے وابستہ بچے ، نوجوان اور بزرگ سب متحرک نظر آتے ہیں کیونکہ یہ ایک تحریک ہے جو خدمت کے جذبہ سے سرشار لوگوں سے منسلک ہے اس کے ذریعے بچوں اور نوجوانوں میں احساس ذمہ داری ،وطن سے محبت اور دوسروں کی مدد کا جذبہ اجاگر ہوتا ہے ۔ مزید یہ بہتر قیادت اور لیڈر شپ کو اُبھارنے کا باعث بھی ہے ۔ اسکاؤٹس بچے لگن اور محنت سے مختلف فنون سیکھ کر اپنی صلاحیتوں کی انتہائی بلندیوں تک پہنچ کر ملک و ملت کا نام روشن کرتے ہیں ۔میں نے اسکاؤٹس کی سرگرمیوں کو بہت قریب سے دیکھا ہے اور محسوس کیا ہے کہ صوبہ سندھ کے ہر بچے کو اس تحریک سے وابستہ کردیا جائے تو ہم ایک اچھا معاشرہ تشکیل دے سکتے ہیں جس کی اس وقت ہم سب کو ضرورت ہے ۔ میری دعا ہے کہ سندھ میں اسکاؤٹ تحریک کو مزید فروغ حاصل ہو ، میری دعائیں اور نیک تمنائیں آپ کے ساتھ ہیں ۔ اللہ تعالی ہم سب کا حامی و ناصر ہو!

اسکاؤٹنگ کا شمار ان تحریکوں میں ہوتاہے جو وقت گزرنے کے ساتھ ساتھ عالمی شہرت اور کامرانی کی حدوں کو چھوتی ہوئی نظر آتی ہیں ۔ اس مثالی تحریک کے بانی لارڈ بیڈن پاول نے ایک ایسے وقت میں اسکاؤٹنگ کی داغ بیل ڈالی جب دنیا مصائب و آلام کا شکار تھی اور انسانوں میں بے لوث خدمت کا جذبہ ختم ہوچکا تھا مگر اس تحریک کے قوانین اور اصولوں کی جامعیت کی بنا ء پر جلد ہی اسے دنیا میں بے حد پذیرائی نصیب ہوئی اور اس کی مقبولیت اور فروغ میں اضافہ ہوتا چلا گیا ۔ پاکستان کے قیام کے ساتھ ہی یہاں بھی اسکاؤٹنگ ٹھوس بنیادوں پر استوار ہوئی جو آج مقبولیت کی بلندیوں کو چھو رہی ہے ۔ اسکاؤٹ تحریک کا منشور رفاہی کاموں کی انجام دہی اور انسانیت کی بے لوث خدمت پر مبنی ہے ۔ اس تحریک نے نوجوانوں کو مثالی کردار کے حامل اور نظم و ضبط کے پابند شہری بنانے میںنمایاں کردار ادا کیا ہے ۔ پاکستان کے پہلے چیف اسکاؤٹ قائد اعظم محمد علی جناح کے تاریخی الفاظ یاد دلانا چاہتا ہوں کہ ہمارے نوجوانوںکو اعلی کردار بنانے میں اسکاؤٹنگ ایک اہم اور نمایاں خدمت سر انجام دے سکتی ہے بابائے قوم کا یہ پیغام ہم سب کیلئے سَرمایہ حیات ہے نوجوانوں کو چاہئے کہ وہ انفرادی اور اجتماعی کوشش سے ان الفاظ کو فِکر و عمل کی سچائی سے روشناس کردیں اور کردار و گُفتار میں پاکیزگی پیدا کریں ۔

میں اسکاؤٹس کو قدر کی نگاہوں سے دیکھتا ہوں کیونکہ اسکاؤٹس خدمت انسانیت میں مصروف رہتے ہیں اور میں اسکول کے وقت سے اسکاؤٹنگ سے متاثر رہا ہوں۔اسکاؤٹ تحریک نے عالمی سطح پر مثالی نظم و ضبط اور خدمت ِ خلق کا ایک ایسا اعلیٰ معیار قائم کیا ہے جو قابل قدر ہے اس اعتبار سے اگر یہ کہا جائے تو بے جا نہ ہوگا کہ یہ تحریک اپنی مثال آپ ہے اس تحریک کی تنظیم کا اور اس کی حقیقی قوت کا سر چشمہ وہ وعدہ ہے جو ہر اسکاؤٹ خود اپنے آپ سے کرتا ہے ۔ وہ اپنی آن پر وعدہ کرتا ہے کہ خدا اور ملک کے فرائض کی ادائیگی میں دوسرے لوگوں کی ہر وقت مدد کرنے اور اسکائوٹ کے قانون پر عمل پیرا ہونےکی ہر ممکن کوشش کرے گا یہی وعدہ اسکاؤٹ تحریک کی کامیابی کی بنیاد ہے ۔ اسکاؤٹ تحریک نے ہمارے نوجوانوں میں باہمی اتحاد ،نظم و ضبط اور خود اعتمادی کے جذبات پیدا کرنے میں اہم کردار ادا کیا ہے ۔ ضرورت اس امر کی ہے کہ ان جذبات کو ہماری نئی نسل میں شعور کی ہرسطح پر عام کیا جائے تاکہ ہمارے مستقبل کی تعمیر کرنیوالوں کی صلاحیتیں زیاد ہ سے زیادہ تعمیری کردار ادا کرسکیں ۔ مجھے خوشی ہے کہ اس کام کا بیڑا سندھ بوائے اسکاؤٹس ایسوسی ایشن نے اٹھایا ہوا ہے میں سندھ بوائے اسکاؤٹس ایسوسی ایشن کی کامیابیوں کیلئے بارگاہِ خُداوندی ِمیں قلب کی گہرائیوں سے دعا گوہوں ۔

السلام علیکم ! اللہ تعالی کے نام سے آغاز کررہا ہوں جو بڑا مہربان اور رحم کرنے والا ہے ۔ لاکھوں درود و سلام اس ذات گرامی پر جو وجہہ تخلیق کائنات اور فخر موجودات ہیں۔ الحمدللہ ! 11اگست 2024ء سے ہم اپنے ویب سائٹ www.sindhscout.orgکو آن ائیر کررہے ہیں اس دعا کے ساتھ کہ اللہ تعالی اس معلوماتی ویب سائٹ کے ذریعہ سندھ اور پاکستان سمیت دنیا بھر کے اسکاؤٹس کو فائدہ پہنچانے کی ہمت عطا فرمائے۔ یہ ایک مکمل اور منفرد ویب سائٹ ہے جس میں وقتاً فوقتاً تبدیلی اور اضافہ ہوتا رہے گا تاکہ آپ اس کی معلومات سے استفعادہ حاصل کرسکیں ۔ سندھ میں اسکاؤٹنگ کی تاریخ ،1926ء سے 2024ء تک کی اصلاحات اور تبدیلیاں ، نوجوانوں کیلئے یوتھ پروگرام کی تفصیلات اور لیڈرز کیلئے اپنی قابلیت میں اضافہ کے طریقہ کار ، سندھ اسکاؤٹس کی منفرد تقریبات اور سندھ بوائے اسکاؤٹس ایسوسی ایشن کے صوبائی ہیڈ کوارٹرز کراچی، تربیتی مرکز گلستان اسکاؤٹس ٹریننگ سینٹر کراچی، ڈویژنل اسکاؤٹ ہیڈکوارٹرز شکار پور اور خیر پور کے مراکز، سندھ بوائے اسکاؤٹس ایسوسی ایشن کے سرپرستوں ، معاونین اور سہولت کاروں کا ذکر ، آئندہ کے پروگرامز ، لائبریری جس میں کتب وہ بھی نئی اور نایاب ،ایسوسی ایشن کی احرارکی اور بچوںو نوجوانوں کی سرگرمیاں شامل ہیں ۔ یقینا ً یہ ویب سائٹ آپ کو پسند آئے گی ، اپنے تاثرات ضرور بھیجیں تجاویز کے ساتھ ۔ سندھ بوائے اسکاؤٹس ایسوسی ایشن اللہ پاک کے کرم سے پاکستان کی تمام صوبائی ایسوسی ایشنز میں سب سے آگے ہے اور تمام صوبائی ایسوسی ایشنز ہم سے بھر پور تعاون بھی کرتی ہیں ۔ میں شکر گذار ہوں گورنر و چیف اسکاؤٹ سندھ جناب کامران خان ٹیسوری کا ، وزیر اعلی سندھ سید مراد علی شاہ صاحب کا جو خود بھی اسکاؤٹ ہیں ، وزیر تعلیم سید سردار شاہ اور صوبائی وزیر جناب ناصر حسین شاہ صاحب کا جن کی سرپرستی ہمیں حاصل ہے ۔ میں اپنے چیف پیٹرن جناب محمد صدیق میمن ، صوبائی کمشنر سید ممتاز علی شاہ ، سیکریٹری تعلیم جناب زاہد عباسی ،سیکریٹری کالجز جناب آصف اکرام ، سیکریٹری بورڈز جناب عباس بلوچ کا کہ جن کی بھر پور سرپرستی اور تعاون سے انشاء اللہ ہم سندھ میں مزید منفرد اور دلچسپ سرگرمیوں کے ساتھ تعلیمی اداروں اور کمیونٹیز میں اسکاؤٹنگ کو فروغ دیں گے ۔